بعض التعليقات الساخره على كلمة الرئيس محمد مرسي في طهران التي ألقاها في
الجلسة الافتتاحية لقمة عدم الانحياز التي استضافتها العاصمة الايرانية .
وما صاحبها من احداث كان ابرزها انسحاب الوفد السوري من القاعة اثناء القاء
مرسي لكلمته.
وبدأ فاضل سليمان القيادي الاخواني التعليقات الساخرة فكتب على تويتر: مش عاجبكم اخونة مصر اهو راح يأخون ايران.
وكتب ادمن صفحة انت عيل اخوانجي على فيس بوك: التلفزيون السوري يتهم مرسي بالتحريض على سفك الدم السوري.. ده القفا طرقع قوي يا ريس.
وكتب ابو حمالات: الوفد السوري خرج غاضبا بسبب كلمة مرسي، والوفد الايراني كان عايز يخرج برضه بس افتكر ان القمة في طهران.
ورد عليه ادم صفحة ارفض حمضنة الدولة: الريس خرج المترجمين من ملّتهم
بقوله " اللهم ارض عن ساداتنا ابوبكر وعمر وعثمان وعلى" .. هاترجموها ازاى
دى يا بنى ادمين؟
كما كتب صفحة انت عيل اخونجى: وكان بيقولك
الاخوان بينفذوا اجندات ايرانية.. اكتشفنا النهاردة ان ايران هي اللي عندها
اجندات مصرية ماركة مرسي
اما ليدي لا لا فكتبت على تويتر: مرسي
ده برنس والله، علم على المشير وطلعه معاش وراح ايران صلى على النبي وترضى
على الصحابة قدام الشيعة، ماشي بمبدأ عبوكو كلكو.
في حين اخذ ميكي في "جر شكل" الدكتور محمد البرادعي وكتب على تويتر "انت مش فرحان زينا يا بوب؟ مرسي حلو"
وسخرت صفحة عكاشيات من انسحاب الوفد السوري بقولها: ملخص عبارة الرئيس مرسي للوفد السورى: اديك تقول ماختش .
اما صفحة احنا كمان بنهزر يا ساويرس فقالت: مين اللى مرسي لسه محطش عليه؟!
- بشار وأعوانه ... تم، إيران والشيعة ... تم، إسرائيل ... تم، أمريكا ...
تم، مجلس الأمن... تم، حتى نخنوخ آساحبي حط عليه حط السنين.
وكتب
صفحة ارفض حمضنة الدولة هذا التساؤل: ايه اخبار علاقه الاخوان بايران..
وايه اخبار التمويل بتاع ايران.. والشيخة ماجدة اللي شافت الجنود
الايرانيين في الثورة راحت فين؟
اما على خفاجي امين الشباب بحزب الحرية والعدالة فكتب: زمان احمدي نجاد بيضرب نفسه 100 جزمة وبيقول اية اللى خلانى ادعوه للقمة.
وكتب الفلويد على تويتر: أنا بقيت مقتنع ان مرسي كل يوم الصبح قبل ما يبدأ
شغل بيسمع أغنية مطلوب زعيم بتاعة كايروكي، وبيعلي الصوت ويغني ف حتة
"مطلوب دكر".
اما الدكتور محمد يسري سلامة القيادي بحزب الدستور فكتب ساخرا: انا حاسس ان نجاد كان نفسه يطلع مطوة ويغز مرسي
